熊市隨筆(四): 中場檢討 及 投資失利

現時市況相對平靜, 大多數人預計未來半年會大跌或者大升, 兩種睇法各有唔同原因支持: 大跌的原因比如油價大跌、經濟低迷、美國失業率急升、北美、歐洲等地未能復工、資本主義盡頭導致泡沫爆破等等, 而大升的原因比如零利率、無限QE、短期已經超跌、各國暴力救市、預期銀紙會大幅貶值等等. 而我很少會預測大市走勢, 原因係 

一、未夠料, 真正有能力預測宏觀的人不多, 他們無論在生意上、投資上都有一定實力, 視野廣闊、夠料先可以作出有力的預測. 

二、大多未知因素影響, 而這些未知因素亦會某程度上決定結果. 

三、偏頗,   個人持股水平偏高,   叫我估市我實話升的.   

平時大家在電視、報紙、Facebook 上見到的投資評論員, 好多時因為自己見識局限, 令他們在睇法上有唔少的偏頗, 導致他們的預測能力同50/50 分別不大, 甚至更低. 當中的確會有高手臥虎藏龍, 但作為一個散户, 我相信未必有能力分析他們誰對誰錯, 如果自己都有能力分析他們對與錯的時候, 倒不如自己作分析, 所以結論係, 與其晒時間估市, 不如檢視手上資產、股票質素:

(1)  跌得多的而沒有回彈的, 究竟損失是暫時性或永久性, 

(2)  跌得少的, 究竟是質素強還是未開始跌,

(3)  有升幅的, 究竟優勢可否維持, 還是只是短期資金炒作

(4)  每日破頂的, 究竟係基本面增長, 還是只是短期資金炒作

(5)  所有資產: 究竟有冇能力捱過實體經濟衰退

個人而言, 以1月時股價作比較, 手上的資產仍然以 (1) – (2) 為主, 部分資產賺錢亦只是因為我敢於3月中入市, 並不代表它們不受肺炎或大市下跌而影響, 以下是我手上資產的部分短評 (質素盡量由低至高排):

質素較差的持股

遠洋集團 (3377.hk)

 ·   2 年前起計的協議銷售與近年的收入及盈利完全不成正比, 相信隱藏了大部分的盈利留代未來 3 年一次過釋放

 ·   派息比率穩定, 未來高盈利會提高股息

 ·   管理層算係千王之王, 但現價的確平, 而且管理層有係跌市中增持
 ·   現時唯一留守的最大原因是低P/B, 不會加注

萊蒙國際(3688.hk)
·  手上持股最大機會係肺炎事件下破產的公司, 高負債, 現金流極差
·  舊改項目一拖再拖, 無了期的項目爛尾大機會令資金鏈斷裂
·  元朗項目、深圳簡上村項目若成功開張, 相信可以食足5 - 10年, 前提係經濟, 樓市冇大幅下行
·  現時唯一留守的最大原因是低P/B, 不會加注

Invesque (IVQ.U)

·  先前可能在歸類上錯誤引導大家, Invesque 並非   REIT structure, 只是上市以黎以類似 (抄) REIT的形式運作

·  目前算係因為第一點而中伏, 皆因它選擇暫停派息, 股價受挫, 但我認同管理層的決定, 確保生存之後再恢復派息

·   個人在跌市中加了不少, 不派息對個人現金流有不少影響, 但對公司價值影響不大, 相信它有能力在業務渡過今次難關

·   現價極抵, 但由於已佔倉位不少, 所以暫時不加注, 除非又急跌   5 成才考慮

恆隆集團 (10.hk)
·   近10年方向是打造商場王國, 轉型做大陸收租股

·   恆隆善於熊市中生存, 負債水平不高, 而且陳生 (恆隆主席) 人面廣, 班到水的機會都高, 相信破產機會不大

·   營運方向未必適合大環境, 尤其是在國內行收租路線

·   個人策略: 繼續月供, 不會大注買

華南城 (1668.hk)
·   同恆隆情況相似, 但華南城面對更嚴重的問題: 大量的高息融資
·   破產機會是有的, 但又未至於死梗, 始終佢有物業銷售去頂一頂, 保住現金流
·   個人策略: 等, 暫時不敢再買

其餘手持的REITs

·   破產機會不高, REITs 自身具有高流動性及高融資能力, 銀行班水的首選, 最壞打算都係蝕賣資產 (謹記: mREITs 不是 REITs)

·  唯一擔心係系統性風險, 一旦全球房地產接二連三地爆煲, 基本上只會死剩大公司同極小債的公司, 大部分公司 (包括REITs) 會陷入財困, 唯有希望係房地產行業係 too big to fail, 皆因一旦大規模爆煲, 相信世界秩序會重新大洗牌, 現時分析的作用 = 0

中銀航空租賃(2588.hk)

·  做得飛機租賃, 後面一定有大佬照住, 中銀航空租賃背後的大佬就係中國銀行 (3988.hk), 不過中國銀行自身都有好多問題, 比如壞帳嚴重, 僅僅 meet 到 Basel Requirements (巴塞爾協議) 等等, 係自身難保的情況, 到時保唔保得住生金蛋的雞 (2588.hk), 應該係話一隻停左生金蛋的雞, 又值得思考一下

·   比起中國飛機租賃 (1848.hk), 中銀航空租賃係相對安全, 但不及國銀租賃 (1606.hk) 安全, 其背後的國家開發銀行一定安全過中國銀行 , 但長遠盈利能力、資產質素則遠勝這兩間公司

·   有機會加小注, 皆因本身持貨不多, 但算係中高風險的玩意

質素較高的持股

新地 (16.hk)

·   如果樓市進入熊市, 相信它會係終極大贏家, 因為它無論係收租王國, 或物業王國, 或是資產質素, 都係全港top tier, 而且財務非常穩健, 破產、財困有排都未輪到佢, 仲可以食埋實力未夠的小型地產商

·   個人策略: 愈跌愈買 (下一注係 HKD 88)

港交所 (388.hk)

·   肺炎疫情對它影響極低, 我唯一諗到的係少左公司到香港上市, 上市費用收入會略略減少

·   個人策略: 以股代息慢慢小量增持

小結: 暫時觀察, 質素較差的持股造成永久性損失的機會很大, 但大多數現價已經低殘致極, 除非有資金需要, 否則個人選擇是一動不如一靜, 反正頻密買賣亦不是在價值投資者的能力圈內.

目前方向是如果大跌市再臨, 在做好壓力測試的情況下, 增持質素較高、肯定能生存的公司為主

至於仍然停牌的 聯合集團 (373.hk), 如果如我上一篇交章所料, 私有化成事, 則會把部分資金轉買內房股, 部分資金用作降槓桿之用, 而內房股的選擇已有心水, 行動後再跟大家分享.